Mtsogoleri wa dziko la Uganda Yoweri Museveni wayamba zokambirana zofuna kudzetsa mtendere pakati pa boma ndi magulu otsutsa mdziko la Burundi pomwe magulu otsutsawo sakugwirizana ndi mfundo yoti Pulezidenti wadzikolo Pierre Nkuruzinza ayimenso kachitatu pa mpando wa upulezidenti.
Malipoti akusonyeza kuti pulezidenti Museveni lachiwiri sabata ino anakumana ndi nthumwi za boma komanso akuluakulu otsutsa boma mdzikolo.
Polankhula asanayambe mkumano ndi akuluakulu ambali ziwirizi pulezidenti Museveni anapempha atsogoleriwo kuti awonetsetse kuti pakhale umodzi pakati pawo.
Iye wati ndi wokondwa kuti boma la dzikolo lathetsa gulu la achinyamata lomwe linakhazikitsa ndi cholinga choti lidzichitira anthu zamtopola.
Pulezidenti Museveni yemwe wakhala akulamulira dziko la Uganda kuyambira mchaka cha 1986 anasankhidwa kukhala mkhala pakati pa zokambirana zapakati pa boma ndi akumbali yotsutsa, pakusamvana komwe kwabuka mdziko la Burundi-lo.
Chisankho cha pulezidenti mdzikolo chikuyembekezeka kuchitika lachiwiri pa 21 mwezi uno.